आर्थिकन्यूज
सियोल। कृत्रिम बुद्धिमत्ता (एआई) सम्बन्धी चिप उद्योगमा आएको उछालसँगै दक्षिण कोरियाली सेयर बजारमा ऋण लिएर लगानी गर्ने प्रवृत्ति तीव्र रूपमा बढेको छ। तर पछिल्ला दिनमा बजारमा देखिएको उच्च उतारचढावले यस्तो लगानीको जोखिमबारे नयाँ चिन्ता थपेको छ।
दक्षिण कोरियाको प्रमुख सेयर सूचक कोस्पीमा यस वर्ष उल्लेखनीय वृद्धि भएको थियो। यो वृद्धिको मुख्य आधार चिप उत्पादक सामसङ इलेक्ट्रोनिक्स र एसके हाइनिक्सका सेयर थिए। एआई प्रविधिको बढ्दो मागका कारण यी कम्पनीहरूको सेयर मूल्य लगातार बढेपछि खुद्रा लगानीकर्ताले ठूलो मात्रामा ऋण लिएर सेयर खरिद गरेका थिए।
बजार उकालो लागेसँगै मार्जिन ऋण तथा लेभरेज्ड लगानी पनि कीर्तिमानी स्तरमा पुगेको छ। दक्षिण कोरियामा सेयर खरिदका लागि लिइएको ऋण हाल ६० ट्रिलियन वनभन्दा बढी पुगेको अन्तर्राष्ट्रिय सञ्चारमाध्यमहरूले जनाएका छन्।
तर अमेरिकी मौद्रिक नीतिप्रतिको अनिश्चितता, विश्वव्यापी प्रविधि कम्पनीहरूको सेयरमा आएको बिक्री चाप तथा बजारमा बढ्दो जोखिमका कारण सोमबार कोस्पी सूचकमा ठूलो गिरावट आएको छ। यस क्रममा सामसङ इलेक्ट्रोनिक्स र एसके हाइनिक्सका सेयर मूल्यमा समेत उल्लेखनीय गिरावट देखिएको छ।
विश्लेषकहरूका अनुसार हालै सुरु भएका सामसङ र एसके हाइनिक्स केन्द्रित लेभरेज्ड एक्सचेन्ज ट्रेडेड फन्ड (ईटीएफ) ले बजारमा अस्थिरता थप बढाउन सक्छन्। यस्ता लगानी उपकरणले नाफाको सम्भावना बढाए पनि घाटाको जोखिम पनि त्यत्तिकै उच्च हुने भएकाले लगानीकर्ताले विशेष सावधानी अपनाउनुपर्ने सुझाव दिइएको छ।
दक्षिण कोरियाको वित्तीय नियामक निकायले समेत अत्यधिक ऋणमा आधारित लगानीले बजारलाई अस्वस्थ बनाउने र सामान्य मूल्य समायोजनले समेत ठूलो नोक्सानी निम्त्याउन सक्ने चेतावनी दिएको छ।
बजार विज्ञहरूका अनुसार एआई चिप उद्योगको दीर्घकालीन सम्भावना बलियो रहे पनि अत्यधिक लेभरेज प्रयोग गरेर गरिएको लगानीले बजारमा आउने सानो झट्कालाई समेत ठूलो आर्थिक जोखिममा बदल्न सक्छ। त्यसैले लगानीकर्ताले अल्पकालीन उत्साहभन्दा जोखिम व्यवस्थापनलाई प्राथमिकतामा राख्नुपर्ने सुझाव दिइएको छ।
प्रतिक्रिया