आर्थिकन्यूज
वीरगञ्ज। विश्व साइकल दिवसको अवसरमा भारतीय महावाणिज्य दूतावास, वीरगञ्जले वीरगञ्ज साइकलिङ क्लबको सहकार्यमा भव्य साइकल र्याली आयोजना गरेको छ। स्वास्थ्य, वातावरण संरक्षण तथा दिगो यातायातको प्रवर्द्धन गर्ने उद्देश्यले आयोजित उक्त कार्यक्रममा विभिन्न क्षेत्रका व्यक्तिहरूको उत्साहजनक सहभागिता रहेको थियो।
भारतीय महावाणिज्यदूत श्री देवी सहाय मीनाले भारतीय महावाणिज्य दूतावास परिसरबाट र्यालीको शुभारम्भ गरेका थिए। र्याली घण्टाघर, माइस्थान, आदर्शनगर, छपकैया हुँदै नेपाल–भारत सीमास्थित शङ्कराचार्य गेटसम्म पुगेको थियो। त्यसपछि सहभागीहरू सोही मार्ग हुँदै पुनः दूतावास परिसरमा फर्किएका थिए।
कार्यक्रममा वीरगञ्ज उद्योग वाणिज्य संघका प्रतिनिधि, स्थानीय प्रतिष्ठित व्यवसायी, नेपाल यङ इन्टरप्रेनर्स फोरम (वीरगञ्ज च्याप्टर) का सदस्य, वीरगञ्ज साइकलिङ क्लबका पदाधिकारी, नागरिक समाजका अगुवा, दूतावासका अधिकारी तथा विद्यार्थीहरूको उल्लेखनीय सहभागिता रहेको थियो।
र्यालीमा सहभागीहरूले छोटो दूरीका यात्राका लागि साइकलको प्रयोग बढाउने प्रतिबद्धता व्यक्त गर्दै स्वच्छ वातावरण निर्माणमा योगदान पुर्याउने संकल्प गरेका थिए। सहभागीहरूले साइकललाई स्वास्थ्यका लागि लाभदायक, वातावरणमैत्री तथा किफायती यातायातको माध्यमका रूपमा अपनाउनुपर्ने आवश्यकता औँल्याए।
कार्यक्रमको समापन दूतावास परिसरमा आयोजित संक्षिप्त समारोहका साथ भएको थियो। सो अवसरमा महावाणिज्यदूत श्री देवी सहाय मीनाले विश्व साइकल दिवसको महत्वबारे प्रकाश पार्दै साइकल चलाउने संस्कृतिले शारीरिक स्वास्थ्य, मानसिक तन्दुरुस्ती र वातावरण संरक्षणमा महत्वपूर्ण भूमिका खेल्ने बताए। उनले साइकल सस्तो, दिगो तथा प्रदूषणरहित यातायातको माध्यम भएकाले यसको प्रयोगलाई प्रोत्साहन गर्न आवश्यक रहेको उल्लेख गरे।
महावाणिज्यदूत मीनाले यस्ता कार्यक्रमहरूले नेपाल र भारतबीचको जनस्तरीय सम्बन्धलाई अझ सुदृढ बनाउने विश्वास व्यक्त गरे। उनले दुवै देशले स्वस्थ जीवनशैली, हरित वातावरण तथा दिगो विकासका साझा लक्ष्यहरू प्राप्त गर्न मिलेर काम गरिरहेको पनि बताए।
उत्साहपूर्ण सहभागितासहित सम्पन्न भएको उक्त कार्यक्रमले स्वास्थ्यप्रति सचेतना अभिवृद्धि गर्नुका साथै स्वच्छ वातावरण र दिगो गतिशीलताको प्रवर्द्धनमा नेपाल र भारतको साझा प्रतिबद्धतालाई पुनः उजागर गरेको छ।
प्रतिक्रिया