आर्थिकन्यूज
काठमाडौं । तिहार भन्ने बित्तिकै उज्यालो, फूल, रोटी र मिठाईको पर्व भन्ने बुझिन्छ । दिदीबहिनीले भाई टीकामा सेल रोटीसँगै विभिन्न किसिमका परिकार बनाउने गरेका छन् । तिहारमा मिष्ठान भोजन तयार कसरी गर्न सकिन्छ भन्ने सम्बन्धमा केही परिकारका टिप्स्हरू यहाँ प्रस्तुत गरिएको छ ।
सेल रोटी
सेलरोटी बनाउनका लागि आवश्यक सामग्रीमा मसिनो गरी पिसेको चामलको पिठो १ किलो, खस्रो चामलको पिठो २ पाउ, मैदा २ पाउ, चिनी २ पाउ, अलैंची पिसेको २० ग्राम, घिउ आवश्यकता अनुसार राख्न सकिन्छ ।
एउटा गहिरो भाँडामा आवश्यकता अनुसार घिउ राखेर फिट्ने, घिउ फिटेर सेतो भएपछि थोरै–थोरै गरेर चामलको पिठोलाई पनि उक्त घिउमा मोल्ने । त्यसपछि मैदा, चिनी तथा अलैंचीको धूलो मिसाउने र त्यसमा आवश्यकता अनुसार पानी हालेर मुछ्ने । त्यसलाई आधा घन्टाजति त्यत्तिकै छाड्ने । सेल पकाउने तावामा सेल डुब्ने गरी घिउ वा तेल तताउने । तातेपछि एक डाडुजति मुछेको पिठो हात, सोली वा अन्य सामग्रीको साहयताले तातेको तेल वा घिउमा हाल्ने र त्यसलाई सेलको आकार दिन सकिन्छ । दुवै साइडमा पल्टाई–पल्टाई पकाएर खैरो भएपछि निकाल्ने ।
चिनी रोटी
चिनी रोटी बनाउनका लागि आवश्यक सामग्रीमा मसिनो गरी पिसेको चामलको ४ कप पिठो, चिनी चार कप र तेल आवश्यकता अनुसार राख्न सकिन्छ । चार कप चामललाई अघिल्लो दिन बेलुका नै भिजाएर राख्ने र भोलिपल्ट विहान झिकेर करिब १ घण्टा जति सुख्खा कपडामा राखेर सुकाउने । त्यसलाई मसिनो गरेर पिसेर पिठो बनाएर जालिले छानेर मसिनो पिठो छुट्याउने ।
उक्त मसिनो पिठोलाई चिनी र आवश्यकता अनुसार पानी मिसाएर मुछ्नु पर्छ । मुछेको पिठोलाई सानो–सानो डल्ला बनाएर प्लास्टिक वा केराको पातमा विस्तारै गोलाकारमा बन्ने गरेर हातका औंलाले पातलोसँग मिलाउनु पर्छ । जसका लागि हात, प्लास्टिक वा केराको पातमा पिठो नलाग्योस् भनेर तेल दल्नु पर्छ । गोलो बनाइएको रोटीको एकसाइड माथि हल्का चिनी छकेर तताएको तेलमा चिनी छर्केको भाग माथि पारेर खैरो हुन्जेल चिनी रोटीलाई पकाउनु पर्छ ।
फिनी रोटी
फिनी राटी बनाउन आवश्यक साढे एक कफ चामलको पिठो, एक किलो मैदा, चिनी स्वाद अनुसार, तेल र घिउ आवश्यकता अनुसार राख्न सकिन्छ । सबैभन्दा पहिले फिनी रोटी पकाउनको लागि मैदाको पिठोलाई पानीमा मिसेर १ घन्टा छोपेर राख्नु पर्छ ।
यता रातभरी पानीमा भिजाएको चामललाई सुकाएर पिनेर त्यसलाई धुलो बनाउनु पर्छ । घिउलाई आवश्यकता अनुसार एक भाडामा राखेर त्यसलाई घोल्नु पर्दछ । घोलेपछि घिउको रङ सेतो हुन्छ । त्यो सेतो घिउमा धुलो बनाएको चामलको पिठोलाई मज्जाले फिटेको घिउमा मुच्छनु पर्छ । त्यसपछि मैदाको पिठोलाई पानी राखेर मुच्छनु पर्दछ ।
उक्त मुछेको पिठोलाई ठिक्कको डल्ला बनाएर तेल लाएर ठूलो बनाएर चारपाटे आकारमा बेल्ने । बेलिसकेको पिठोमाथि घिउमा मिसाएको चामलको पिठोको लेपलाई सबै तिर लाग्ने गरेर दल्नु पर्छ । लेप लागिसकेपछि मैदालाई गोलो गरेर बेर्ने र त्यसलाई दुई इन्चमा फरमा काट्ने । काटेर राखेको मैदाको पिठोलाई तेल लाएर चारपाटा आकार अनुसार बेल्ने । त्यसलाई तातेको तेलमा बेलेको रोटी राख्ने जसलाई दुई देखि तीन मिनेटसम्म पकाएपछि रोटी तयार हुन्छ ।
