आर्थिकन्यूज
एजेन्सी । स्पेनमा भारी वर्षा र अचानक आएको बाढीका कारण अहिलेसम्म ९५ जनाको मृत्यु भएको छ । सीएनएनका अनुसार भ्यालेन्सिया सहर सबैभन्दा बढी प्रभावित भएको छ । यहाँ अहिलेसम्म ९२ जनाको मृत्यु भइसकेको छ । धेरै मानिस अझै बेपत्ता भएकाले मृतकको संख्या बढ्न सक्ने अधिकारीहरुले बताएका छन् । बीबीसीका अनुसार स्पेनमा पछिल्लो ५० वर्षमा बाढीका कारण मृत्यु हुनेको यो सबैभन्दा धेरै संख्या हो । यसअघि सन् १९७३ मा बाढीका कारण १५० जनाको मृत्यु भएको थियो ।
राज्य मौसम विभागका अनुसार बुधबार पूर्वी स्पेनका धेरै ठाउँमा केही घण्टामा १२ इन्चभन्दा बढी वर्षा भएको थियो। भ्यालेन्सियाका एक अधिकारीले आधा घण्टामा सहरमा ठूलो विनाश भएको बताए । अदालतलाई अस्थायी शवगृहमा परिणत गरिएको छ। दुर्घटनापछि स्पेनका प्रधानमन्त्री पेड्रो सान्चेजले ३ दिने राष्ट्रिय शोकको घोषणा गरेका छन् ।
स्पेनका मन्त्रीले भने– ‘भ्यालेन्सियाबाहेक मलागा र कास्टिल–ला–मान्चा सहर पनि बाढीबाट कति मानिस बेपत्ता छन् भन्ने तथ्यांक हामीसँग छैन ।’ बाढीका कारण सडकहरु भत्किएका छन् भने सञ्चार र विद्युत् लाइनमा क्षति पुगेका कारण धेरै क्षेत्रहरु अझै सहरहरुबाट विच्छेद भएका छन् ।
स्पेनी सरकारका एक मन्त्री एन्जेल भिक्टर टोरेसले भने, ‘हामीसँग हाल कति व्यक्ति बेपत्ता छन् भन्ने तथ्याङ्क छैन। सामाजिक सञ्जालमा बाढीसँग सम्बन्धित धेरै भिडियो भाइरल भइरहेका छन् । यसमा सवारीसाधन एकअर्काको माथि राखिएका हुन्छन् ।३०० यात्रु बोकेको एक उच्च गतिको रेल मलागा नजिकै पटरीबाट खस्यो । र यद्यपि रेल अधिकारीहरूका अननुसार कुनै मानवीय हताहत भने भएको छैन।
राहत कार्यमा एक हजारभन्दा बढी सैनिक तैनाथ बाढी प्रभावित क्षेत्रमा राहत कार्यमा सेनाका एक हजारभन्दा बढी जवान खटिएका छन् । बेपत्ता व्यक्तिहरूको खोजी गर्न ड्रोनको प्रयोग भइरहेको एक अधिकारीले बताए।
युरोपेली संघका प्रमुख उर्सुला भोन डर लेनले स्पेनिस उद्धार टोलीहरूलाई मद्दत गर्न कोपर्निकस उपग्रह प्रणाली सक्रिय गरेको बताइन्। यसबाहेक अन्य युरोपेली छिमेकीहरूले पनि सहायता पठाउने प्रस्ताव गरेका छन्।
