आर्थिकन्यूज
काठमाडौं । अविरल वर्षाका कारण उपत्यकाका खोला तथा नदीमा पानीको बहाव बढेपछि सुरक्षाका प्रहरीको गस्ती परिचालित गरिएको छ । काठमाडौँ उपत्यका प्रहरी कार्यालयका प्रवक्ता एवं प्रहरी वरिष्ठ उपरीक्षक दिनेशराज मैनालीले उपत्यकाका करिडोर क्षेत्रमा सम्भावित जोखिम रोक्न प्रहरीले गस्ती थालेको जानकारी दिए । उनले भने, “बाढीले नदीका तटीय क्षेत्रका बासिन्दालाई पर्नसक्ने असर र जोखिमलाई मध्यनजर गरेर सबै करिडोरमा गस्ती थालिएको छ ।”
प्रवक्ता मैनालीले वाग्मती, विष्णुमती, मनहरा, हमुमन्तेलगायत सबै नदी खोलाका करिडोरमा अहिले प्रहरीको गस्ती जारी रहेको बताए । अहिलेसम्म उपत्यकामा विपद्जन्य घटना नभएको भन्दै उपत्यकाका तीनवटै जिल्लाका सुरक्षाकर्मीलाई खोला तथा नदी तटीय क्षेत्रमा हुनसक्ने सम्भावित घटनामा उद्धार गर्न तयारी अवस्थामा राखिएको उनले जानकारी दिए ।
“यो बेलामा घटना भइहाल्न सक्छन्, त्यसलाई ध्यानमा राखेर टोली तयारी अवस्थामा राखेका छौँ”, प्रहरी वरिष्ठ उपरीक्षक मैनालीले भने, “कतैबाट सूचना आउनेवित्तिकै परिचालन गरी उद्धारमा खटिने छौँ ।” वर्षाका कारण आज देशका अधिकांश जिल्लाको जनजीवन प्रभावित भएको छ भने ठाउँठाउँमा सडक अवरुद्ध भएका छन् । कतिपय ठाउँमा डुबान, बाढी तथा पहिरोले जनजीवन प्रभावित बनाएको प्रहरी प्रधान कार्यालयले जनाएको छ ।
