आर्थिकन्यूज
काठमाडौं । एनआईसी एशिया ग्रोथ फण्ड २ को इकाई मङ्सिर १८ गतेसम्म मात्र बिक्रीमा रहने भएको छ । एनआईसी एशिया क्यापिटल लिमिटेडले सञ्चालन गर्ने गरी यस योजनाको इकाई मङ्सिर ४ गतेदेखि सार्वजनिक निष्कासनमा ल्याएको हो ।
क्यापिटलले प्रतिइकाई १० रुपैयाँ अंकित मूल्यमा १ अर्ब रुपैयाँ बराबरको १० करोड इकाई बिक्रीमा ल्याएको हो । विक्री गरिने कुल इकाईमध्ये कुल बिक्री भएको इकाईसंख्याको १५ प्रतिशत वा १ करोड ५० लाख इकाई कोष प्रवर्धक एनआईसी एशिया बैंकलाई सुरक्षित गरी बाँकी रहेको ८ करोड ५० लाख इकाई सर्वसाधारणलाई बिक्री खुला गरिएको हो ।
यो इकाई खरीदका लागि छिटोमा मंसिर ७ गतेसम्म आवेदन दिन सकिने व्यवस्था रहेपनि सो अवधिसम्म माग बमोजिम आवेदन नपरेपछि ढिलो अवधि मङ्सिर १८ गतेसम्म विक्री खुला गरिएको हो । मङ्सिर १७ गते विहान १० बजेसम्म यस योजनाको इकाई खरीदका लागि ५४ हजार ७९७ जनाले आवेदन दिएका छन् । सिडिएस एण्ड क्लियरिङ लिमिटेडले दिएको जानकारी अनुसार यी आवेदकहरूबाट ८ करोड ३९ लाख ९० हजार १२० इकाई खरीद माग भएको हो ।
यो इकाई खरीदका लागि न्यूनतम १०० इकाईदेखि अधिकतम १ करोड इकाईसम्म आवेदन दिन सकिनेछ । इकाई बिक्रीका लागि खुला गरिएको अवधि तथा बोर्डबाट थप भएको अवधि भित्र कम्तीमा ५० प्रतिशत अर्थात ५ करोड इकाई खरिद गर्न निवेदन प्राप्त भएमा इकाईको बाँडफाँट गर्न सकिने व्यवस्था छ । सो अवधिसम्म न्यूनतम संख्यामा इकाई बिक्री नभएमा योजना खारेज गरी १५ दिन भित्र निवेदकहरुको रकम फिर्ता गर्न भुक्तानी प्रक्रिया शुरु गरिने व्यवस्था समेत रहेको छ । योजनाको इकाई खरीदका लागि हालसम्म परेको तथ्याङ्क रितपूर्वक भएमा करिब ९९ प्रतिशत इकाई विक्री भइसकेको अवस्था छ ।
यो इकाई निष्कासन तथा विक्री प्रबन्धकमा एनआईसी एशिया क्यापिटल लिमिटेड रहेको छ । ७ वर्षे अवधिको बन्दमुखी प्रकृतिको यस योजनाको इकाई खरीदका लागि नेपाल धितोपत्र बोर्डबाट अनुमति प्राप्त सम्पूर्ण आस्बा सदस्य बैंक तथा वित्तीय संस्था र तिनका तोकिएको कार्यालयबाट आवेदन दिन सकिनेछ । साथै मेरो शेयर अनलाईन मार्फत समेत आवेदन दिन सकिनेछ ।
