आर्थिकन्यूज
काठमाडौं । सन नेपाल लाइफ इन्स्योरेन्स कम्पनी लिमिटेडको आईपीओ असोज २ गते नेपाल स्टक एक्सचेन्ज नेप्सेमा सूचीकृत भएको छ । कम्पनीको कुल ३ करोड २० लाख कित्ता साधारण शेयर सूचीकृत भएको हो । सूचीकृत भएको दोस्रो कारोबार दिनदेखि कारोबारमा आउने कम्पनीको आईपीओ बिहीवारदेखि मात्र कारोबारमा आउनेछ । बुधवार सार्वजनिक विदा परेकाले कम्पनीको आईपीओ बिहीवारदेखि मात्र कारोबारमा आउने भएको हो ।
कम्पनीको आईपीओलाई पहिलो कारोबारको लागि नेप्सले प्रतिकित्ता १८५ रूपैयाँ ४१ देखि ४७५ रूपैयाँ २३ सम्म पैसासम्मको खुला मूल्य तोकिदिएको छ । नेप्सेले तोकेको खुला मूल्यको आधारमा कम्पनीको शेयर बिहीवार देखि कारोबारमा आउनेछ ।
कम्पनीले सर्वसाधारण ,वैदेशिक रोजगारीमा रहेका नेपाली, सामुहिक लगानी कोष,कर्मचारीहरुलाई वितरण गरेको ९६ लाख कित्ता र कम्पनीका संस्थापकहरुले लगानी गरेको २ करोड २४ लाख कित्ता गरेर कुल ३ करोड २० लाख कित्ता साधारण शेयर सूचीकृत गराएको हो । स्टक सिम्बोल एसएनएल आई रहेको छ । शेयर सूचीकरण पश्चात कम्पनीले दिनुपर्ने आरटिएस सेवा नेपाल एसबिआई मर्चेन्ट बैंकिङ्ग लिमिटेड ठमेल काठमाडौंबाट हुने जानकारी गराएको छ ।
