आर्थिकन्यूज
काठमाडौं। ट्रेड टावर लिमिटेडले आईपीओ बिक्री गर्न नेपाल धितोपत्र बोर्डबाट अनुमति पाएको छ । कम्पनीले प्रतिकित्ता १०० रुपैयाँको दरले कुल ३९ करोड ७१ लाख ६९ हजार ३०० रुपैयाँ बराबरको ३९ लाख ७१ हजार ६९३ कित्ता आईपीओ जारी गर्न अनुमति पाएको हो ।
कम्पनीले २०७९ असार १४ गते बोर्डमा आईपीओ बिक्रीका लागि अनुमति मागेको थियो । आवेदन दिएको ३२ महिना पछि कम्पनीले स्वीकृति पाएको हो । कम्पनीले जारी पुँजीको ४८.६९६ प्रतिशत आईपीओ निष्काशन गर्न लागेको हो ।कम्पनीको आईपीओ निष्कासन तथा बिक्री प्रबन्धकमा लक्ष्मी सनराइज क्यापिटल रहेको छ ।
ट्रेड टावर लिमिटेडले गत वर्ष (सन् २०२४) मा ११ करोड १० लाख रुपैयाँ आम्दानी गरेको थियो । जुन सन् २०२३ को भन्दा २३.३३ प्रतिशत धेरै हो । सन् २०२३ मा यस कम्पनीले ९ करोड रुपैयाँ बराबरको आम्दानी गरेको थियो ।
सन् २००७ मा स्थापना भएकोे ट्रेड टावर लिमिटेड एक सार्वजनिक लिमिटेड कम्पनी हो । जुन लिजिङ, वित्तीय लगानी र पूर्वाधार विकास सम्बन्धी गतिविधिहरुमा संलग्न छ ।
टावरको पहिलो परियोजना ‘ट्रेड टावर थापाथली’ सन् २०११ को अप्रिलदेखि सञ्चालनमा आएको व्यावसायिक भवन हो । यसले दोस्रो परियोजना अन्तर्गत गौशालामा रहेको ट्रेड टावरलाई गौशालालाई पुनःविकास गरी होटेल क्रिस्टल पशुपति नामक ३ तारे होटल निर्माण गरेको छ । होटलले सन् २०२४ को मध्य-अप्रिलदेखि आंशिक रुपमा सञ्चालन सुरु गरेको छ ।
