आर्थिकन्यूज
aकाठमाडौं । नेपाल स्टक एक्सचेन्ज (नेप्से) मा मंगलबार २ कम्पनीको हकप्रद र २ कम्पनीको बोनस शेयर सूचीकृत भएको छ । नेप्सेका अनुसार ङादी ग्रुप पावर तथा बलेफी हाइड्रोपावरको हकप्रद शेयर तथा नेपाल एसबीआई बैंक र फरवार्ड माइक्रोफाइनान्सको बोनस शेयर सूचीकृत भएको हो ।
नेप्सेमा ङादी ग्रुप पावरको १ करोड ८५ लाख १२ हजार ७९२.२२५ कित्ता हकप्रद शेयर सूचीकृत भएको छ । ङादीले १ः१ अनुपातमा (१०० प्रतिशत) बिक्री गरेको हकप्रद शेयर नेप्सेमा सूचीकृत भएको हो ।
त्यस्तै, बलेफी हाइड्रोपावरको पनि १ करोड ८२ लाख ७९ हजार ७०० कित्ता हकप्रद शेयर सूचीकृत भएको छ । यो कम्पनीको पनि शतप्रतिशत हकप्रद शेयर सूचीकरण भएको हो । हकप्रद सेयर सूचीकृत पछि बलेफीको चुक्ता पुँजी ३ अर्ब ६५ करोड ५९ लाख रुपैयाँ पुगेको छ ।
नेपाल एसबीआईको ३.८० प्रतिशतले हुने ३३ लाख ९० हजार ५७.८७ कित्ता बोनस सेयर सूचीकृत भएको छ । बैंकले आर्थिक वर्ष २०८०/८१ को मुनाफाबाट सेयरधनीलाई ३.८० प्रतिशत बोनस सेयर वितरण गरेको थियो ।
यसैगरी, फरवार्ड माइक्रोफाइनान्सको पनि १४ लाख ३ हजार ८९९.७६ कित्ता बोनस सेयर सूचीकृत भएको हो । कम्पनीले गत वर्षको नाफाबाट वितरण गरेको १३.३० प्रतिशत बोनस सेयर अहिले सूचीकृत भएको हो ।
उक्त बोनस र हकप्रद शेयर सेयरधनीहरुले डिम्याट खातामा जम्मा भएपछि बिक्री गर्न सक्नेछन् ।
