आर्थिकन्यूज
काठमाडौं । संघीय सांसद दीपक बोहराको निधन भएको छ । राप्रपा सांसद एवं पूर्वमन्त्रीसमेत रहेका बोहराको उपचारका क्रममा मंगलबार बिहान ओम अस्पताल निधन भएको पार्टीका प्रवक्ता मोहनकुमार श्रेष्ठले जानकारी दिएका छन् । बोहरा ७४ वर्षका थिए ।
२०७७ साल जेठमा कोरोना भाइरसबाट संक्रमित भएपछि बोहराको स्वास्थ्यमा समस्या देखिएको थियो । बोहरा रुपन्देही निर्वाचन क्षेत्र नम्बर ३ बाट विजयी भएका थिए । उनले कांग्रेस नेता बालकृष्ण खाँणलाई हराएका थिए । बोहरालाई एमाले र जसपाको समेत समर्थन थियो ।
बोहोरा नेपालको राजनीतिमा झन्डै ४ दशकदेखि राप्रपामा क्रियाशील रहँदै आएका थिए । २०३६ सालमा रुपन्देहीबाट राष्ट्रिय पञ्चायत सदस्यमा निर्वाचित उनी २०४२ सालको राष्ट्रिय पञ्चायत सदस्यमा समेत विजयी भएका थिए । उनी २०७० सालमा रुपन्देही निर्वाचन क्षेत्र नम्बर २ बाट संविधानसभा सदस्यमा निर्वाचित भएका थिए ।
उनी २०३८ सालमा पर्यटन राज्यमन्त्री र पर्यटन सहायकमन्त्री, २०४० मा पर्यटन राज्यमन्त्री, २०४३ मा निर्माण तथा यातायात राज्यमन्त्री, २०४४ मा निर्माण तथा यातायातमन्त्री, २०६७ मा वन तथा भूसंरक्षण मन्त्री, २०७२ मा श्रम तथा रोजगार मन्त्री, २०७३ सालमा आपूर्तिमन्त्री, २०७४ मा स्वास्थ्यमन्त्री बनेका थिए ।
