एनआईसी एशियाको निक्षेप करिब ६२ अर्बले घट्दा कर्जा साढे ३५ अर्बले घट्यो, अन्य बैंकको के छ अवस्था ?

काठमाडौं । चालु आर्थिक वर्षको ८ महिनमा एनआईसी एशिया बैंकको निक्षेप ६१ अर्ब ८६ करोडले घटेको छ । नेपाल बैकर्स संघका अनुसार असार मसान्तसम्म एनआईसी एशिया बैंकमा ३ खर्ब ६० अर्ब ५४ करोड निक्षेप रहेको थियो । फागुन मसान्तमा आइपुग्दा बैंकको निक्षेप २  खर्ब ९८ अर्ब ६८ करोडमा झरेको छ ।

यस्तै बैंकको निक्षेपसँगै कर्जा समेत घटेको छ । असार मसान्तमा २ खर्ब ८५ अर्ब ३३ करोड कर्जा प्रवाह गरेकोमा फागुनमा २ खर्ब ४९ अर्ब ९० करोड कर्जा प्रवाह गरेको छ । तथ्यांक अनुसार बैंकमा ३५ अर्ब ४३ करोडले कर्जा घटेको हो ।

बैंकर्स संघका अनुसार ८ महिनाको अवधिमा वाणिज्य बैंकहरुमा २ खर्ब ८२ अर्ब २७ करोडले निक्षेप बढ्दा २ खर्ब ७८ अर्ब ६८ करोडले कर्जा प्रवाह बढेको छ । ८ महिनाको अवधिमा संकलन भएको निक्षेप भन्दा २ अर्ब ५९ करोड कम कर्जा प्रवाह भएको छ ।  

८ महिनाको अवधिमा सबैभन्दा निक्षेप बढाउन भने नेपाल इन्भेष्टमेन्ट मेगा बैंक सफल भएको छ । इन्भेष्टमेन्ट मेगा बैंकले ४५ अर्ब ८४ करोडले निक्षेप बढाएको छ । कर्जा भने ग्लोबल आईएमई बैंक अगाडि देखिएको छ । ग्लोबलले ३९ अर्ब ६ करोडले कर्जा बढाएको छ । समीक्षा अवधिमा एनआईसी एशिया बाहेक सबै बैंकको निक्षेपमा सुधार आएको छ । एनआईसी, प्रभु र स्ट्याण्र्डड चार्टड बैंकको कर्जा घटेको छ । 

७ बैंकको निक्षेप संकलन भन्दा कर्जा प्रवाह धेरै

गत असारमा २० वाणिज्य बैंकहरूको निक्षेप ५७ खर्ब ५४ अर्ब रूपैयाँ रहेकोमा फागुनसम्म आइपुग्दा बढेर ६० खर्ब ३७ अर्ब रूपैयाँ पुगेको छ । त्यस्तै, कर्जा ४५ खर्ब ७० अर्बबाट बढेर ४८ खर्ब ५० अर्ब पुगेको छ ।  यो अवधिमा ७ वाणिज्य बैंकले निक्षेपभन्दा धेरै कर्जा विस्तार गरेका छन् । सिटिजन्स बैंक, एभरेष्ट बैंक, ग्लोबल आइएमई बैंक, कुमारी बैंक, लक्ष्मी सनराइज बैंक, माछापुच्छ्रे बैंक र राष्ट्रिय वाणिज्य बैंकको कर्जाको वृद्धिदर निक्षेपको तुलनामा धेरै छ ।

औसत सिडी रेसीयो ७९.२९ प्रतिशत 

चालु आवको फागु्न महिनासम्म २० वाणिज्य बैंकहरुको औसत सिडी रेसीयो ७९.२९ प्रतिशत कायम भएको छ । यस अवधिमा सबैभन्दा धेरै माछापुच्छ्रेको बैंकको ८५.६५ प्रतिशत तथा सबैभन्दा कम राष्ट्रिय वाणिज्य बैंकको ६३.८६ प्रतिशत रहेको छ ।