आर्थिकन्यूज
काठमाडौं । हिमालयन लाइफ इन्स्योरेन्स लिमिटेडले फागुन ११ गते १७औं वार्षिक साधारण सभा बोलाएको छ । माघ १४ गते बसेको कम्पनीको सञ्चालक समितिको बैठकले अनुपम फुडल्याण्ड एण्ड बैंक्वेट, बत्तिसपुलती, काठमाडौंमा विहान १०ः३० बजे सभा गर्ने निर्णय गरेको हो । सभाले प्रस्तावित १४ प्रतिशत बोनस शेयरलाई अन्तिम स्वीकृति प्रदान गर्नेछ ।
कम्पनीले अघिल्लो आर्थिक वर्ष ०७९/८० को मुनाफाबाट हाल कायम चुक्तापूँजी ८ अर्ब २ करोड ३ लाख ८३ हजार रुपैयाँको आधारमा १४ प्रतिशत बोनस शेयर वितरण गर्न लागेको हो । साविक गुराँस लाइफ इन्स्योरेन्स र यूनियन लाइफ इन्स्योरेन्ससँर्ग मर्जर प्रक्रियापछि बनेको यस कम्पनीलाई बोनस शेयरमा लाग्ने कर भने छुट हुने भएकाले नगद लाभांश प्रस्ताव नगरिएको हो ।
लाभांश प्रस्तावसँगै आर्थिक वर्ष ०७९/८० को वार्षिक प्रतिवेदन सहितका वित्तीय विवरणहरु पारित गर्नुका साथै गत आर्थिक वर्ष ०८०/८१ को लागि लेखापरिक्षक नियुक्ती र निजको पारिश्रमिक निर्धारणको विषय पनि सभाले टुङ्ग्याउनेछ । बोनस शेयर वितरणपछि कम्पनीको पूँजी बृद्धि हुने भएकाले सोही बमोजिम प्रबन्धपत्र तथा नियमावली संशोधन प्रस्ताव पनि सभाका लागि तय गरिएको छ ।
साधारण सभा प्रयोजनका लागि कम्पनीले माघ २५ गते एक दिन बुक क्लोज गर्न लागेको छ । बुक क्लोजको आधारमा माघ २४ गतेसम्म कायम शेयरधनीहरुले मात्र सभामा भाग लिन र लाभांश प्राप्त गर्न सक्नेछन् ।
