आर्थिकन्यूज
चितवन । चितवनको भरतपुर सडक क्षेत्रमा एक व्यक्तिमाथि प्रहरीले गरेको कुटपिटको घटना गएको पुस १५ गतेको भएको खुलेको छ । अस्थायी प्रहरी पोष्ट गणेशस्थान बिटमा कार्यरत असई बुद्धिबहादुर घर्तीले मध्यराति ती युवकलाई कुटपिट गरेको खुलेको जिल्ला प्रहरी कार्यालय, चितवनले जनाएको छ ।
कुटपिट गर्ने असई घर्तीलाई निलम्बन गरिएको छ । भरतपुर महानगरपालिका–११ बसेनी चोकमा प्रहरीले एक व्यक्तिलाई कुटपिट गरिरहेको भिडियो सार्वजनिक भएपछि घर्ती निलम्बनमा परेका हुन् ।
चितवन प्रहरीले घटना छानबिनका लागि डीएसपी ज्ञानकुमार महतोको नेतृत्वमा पाँच सदस्यीय छानबिन समिति समेत गठन गरेको थियो । सवारी चेकजाँचको क्रममा युवकलाई कुटपिट गरेको भिडियोमा देख्न सकिन्छ । मोटरसाइकलको लाइसेन्स चेक गरिरहेको र त्यसपछि सडकपेटी छेउमा सेतो सर्टमा रहेका युवकलाई प्रहरीले बुटले पटकपटक हानेको भिडियोमा देखिएको छ ।
कुटाइखाने व्यक्ति भरतपुरकै स्थानीयबासी रहेको प्रहरीले उल्लेख गरेको छ ।
