काठमाडौं । रिभर फल्स पावर लिमिटेडले वैशाख २० गते दुई आर्थिक वर्षको संयुक्त वार्षिक साधारण सभा बोलाएको छ । चैत २८ गते बसेको कम्पनीको सञ्चालक समितिको बैठकले अघिल्ला दुई आर्थिक वर्ष ०७८/७९ र ०७९/८० को संयुक्त वार्षिक साधारण सभा लिसारा रिसेप्सन, नक्साल, काठमाडौंमा गर्ने निर्णय गरेको हो ।
यी दुई आर्थिक वर्षको वार्षिक प्रतिवेृदन सहितका वित्तीय विवरणहरू पारित गर्दै चालू आर्थिक वर्षको लागि लेखापरिक्षक नियुक्ती र निजको पारिश्रमिक निर्धारणको विषय समेत टुङ्ग्याउनेछ । हाल कायम चुक्तापूँजीको आधारमा शतप्रतिशत हकप्रद शेयर निष्कासनको प्रस्ताव पनि सभाले पारित गर्नेछ ।
कम्पनीले बैंक ऋण भुक्तानीको लागि हकप्रद शेयर निष्कासन गर्न लागेको हो । हाल कम्पनीको चुक्तापूँजी ७० करोड रूपैयाँ रहेको छ । सोही पूँजीको अधारमा कम्पनीले ७० करोड रूपैयाँ बराबरकै हकप्रद विक्री गर्ने निर्णय गरेको हो । शतप्रतिशत हकप्रद निष्कासन तथा बाँडफाँटपछि कम्पनीको चुक्तापूँजी १ अर्ब ४० करोड रूपैयाँ कायम हुनेछ ।
शेयर निष्कासनका लागि आवश्यक कामको जिम्मेवारी सञ्चालक समितिलाई दिने निर्णय पनि सभाले गर्नेछ । साधारण सभा प्रयोजनका लागि कम्पनीले वैशाख १० गते एक दिन बुक क्लोज गर्ने भएको छ । बुक क्लोजको आधारमा वैशाख ९ गतेसम्म कायम शेयरधनीहरू मात्र सभामा भाग लिन योग्य हुनेछन् ।
