काठमाडौं । नेपालमा सञ्चालित निर्जीवन बीमा कम्पनीहरुको चालू आर्थिक वर्ष २०८०/८१ को आठ महिनामा २६ अर्ब रुपैयाँ भन्दा बढी बीमाशुल्क संकलन गरेका छन् । चालू आवको साउनदेखि फागुन मसान्तसम्ममा २६ अर्ब १६ करोड ५० लाख रुपैयाँ बराबरको बीमा शुल्क संकलन गरेका हुन् । यो शुल्क १९ लाख १६ हजार ६६६ बीमालेख बिक्री गरेर संकलन भएको हो ।
नेपाल बीमा प्राधिकरणका अनुसार गत फागुन महिनामा मात्रै निर्जीवन बीमा कम्पनीहरुले ३ अर्ब ६४ करोड ८३ लाख रुपैयाँ बराबरको बीमाशुल्क संकलन गरेका छन् । यस अवधिमा यी कम्पनीहरुले २ लाख ४५ हजार ५६० वटा बीमालेख बिक्री गरेका हुन् ।
फागुन महिनामा नेपाल इन्स्योरेन्स कम्पनीले १२ करोड ९ लाख रुपैयाँ बराबरको बीमाशुल्क आर्जन गरेको छ । यो शुल्क १७ हजार ८६४ बीमालेख बिक्री गरेर आएको हो । त्यस्तै, यस अवधिमा दि ओरिएन्टल इन्स्योरेन्स कम्पनी लिमिटेडले १२ करोड ९ लाख रुपैयाँ बीमाशुल्क संकलन गरेको छ भने राष्ट्रिय बीमा कम्पनीले २८ करोड ८५ लाख रुपैयाँ बीमाशुल्क संकलन गरेको छ ।
यस अवधिमा नेशनल इन्स्योरेन्स कम्पनी लिमिटेडले भने ६ करोड ६९ लाख रुपैयाँ बीमाशुल्क संकलन गरेको छ । यस्तै, नेको इन्स्योरेन्स कम्पनी लिमिटेडले २४ करोड ४९ लाख रुपैयाँ बीमाशुल्क संकलन गर्दा प्रभु इन्स्योरेन्स कम्पनी लिमिटेडले ११ करोड ६८ लाख रुपैयाँ संकलन गरेको छ ।
त्यस्तै, शिखर इन्स्योरेन्स कम्पनीले ८२ करोड ३० लाख रुपैयाँ, एनएलजी इन्स्यारेन्स कम्पनीले १८ करोड ४७ लाख रुपैयाँ, हिमालयन एभरेष्ट इन्स्यारेन्स कम्पनीले २२ करोड ३ लाख रुपैयाँ र सानिमा जिआईसी इन्स्यारेन्स कम्पनीले २१ करोड २१ लाख रुपैयाँ बीमा शुल्क संकलन गरेका छन् ।
निर्जीवन बीमा व्यवसाय गर्नेहरुमध्ये सिद्धार्थ प्रिमियर इन्स्योरेन्स कम्पनीले गत मंसिर महिनामा २९ करोड १२ लाख बीमा शुल्क संकलन गरेको छ । सगरमाथा लुम्बिनी इन्स्योरेन्स कम्पनी लिमिटेडले ३७ करोड १० लाख, आइजिआई प्रूडेन्सियल इन्स्योरेन्स कम्पनी लिमिटेडले ३६ करोड २८ लाख र युनाइटेड अजोड इन्स्योरेन्स कम्पनीले २२ करोड ३७ लाख रुपैयाँ बीमाशुल्क संकलन गरेको प्राधिकरणले जानकारी दिएको छ ।
