काठमाडौं । काठमाडौँ महानगरपालिकाले टिपटप मिठाई पसललाई दुई लाख रुपैयाँ जरिवाना गरेको छ । काठमाडौंको विशालबजार नजिकै रहेको यो मिठाई पसल चर्चित छ ।

बजार अनुगमनका क्रममा काठमाडौँ महानगरपालिका वडा नं १७, शुक्रपथमा सञ्चालित उक्त मिठाई पसलले अखाद्य वस्तु बेचेको पाइएपछि रु दुई लाख जरिवाना गरिएको काठमाडौँ महानगरपालिकाका प्रहरी प्रमुख राजुनाथ पाण्डेले जानकारी दिए ।

दीपकराज थपलियाले सञ्चालन गरेको उक्त मिठाई पसलले उत्पादन गरेको सामान बिग्रिएको पाइएपछि जरिवाना गरेको प्रहरी प्रमुख पाण्डेले बताए । महानगरपालिकाले पसलमा अखाद्य वस्तु नराख्न, कर्मचारीको बोलीबचन सुधार गर्न र दूधजन्य वस्तुको तापक्रम कायम राख्न आदेश समेत दिएको छ ।