आर्थिकन्यूज
एजेन्सी । एलोन मस्कको ब्रेन इम्प्लान्ट कम्पनी न्युरालिङ्कले बिहीबार साँझ मानवमा यसको प्रयोगात्मक उपकरणको पहिलो क्लिनिकल परीक्षण सञ्चालन गर्न नियामक अनुमोदन प्राप्त भएको बताएको छ। अमेरिकाको यूएस फुड एन्ड ड्रग एडमिनिस्ट्रेशनद्वारा भएको यो अनुमोदन सो कम्पनीको लागि कोशे ढुङ्गा साबित हुनेछ ।
एलोन मस्कको ब्रेन इम्प्लान्ट कम्पनी न्युरालिङ्कले रोबोटद्वारा मस्तिष्कमा शल्यक्रिया गरी राख्न उद्देश्यले उपकरण विकास गरिरहेको छ । जुन मस्तिष्कको गतिविधि डिकोड गर्न र कम्प्युटरमा लिङ्क गर्न सक्षम छ । अहिलेसम्म कम्पनीले जनावरमा मात्रै यस्तो अनुसन्धान गरेको छ ।
"हामीले यो सुनाउन पाउँदा उत्साहित छौँ कि हामीले हाम्रो पहिलो मानव क्लिनिकल अध्ययन सुरु गर्न एफडीए बाट स्वीकृति प्राप्त गरेका छौँ!" न्युरालिङ्कले ट्विटरमार्फत घोषणा गर्यो, यसलाई "एक दिन हाम्रो प्रविधिले धेरै मानिसहरूलाई मद्दत गर्न सक्ने छ र यो एउटा महत्त्वपूर्ण पहिलो कदम हो।" मस्कले आफ्नो टोलीलाई बधाई दिँदै पोस्टलाई रिट्वीट गरे।
तर, एफडीआईले यसको आधिकारिक पुष्टि भने गरिसकेको छैन । त्यसो त मस्कले केही समयअघि नै नियामक स्वीकृतिको दाबी गरिसकेका थिए । सन् २०१७ मा उनले ट्विटरमा लेखे कि उनको टनेलिङ फर्म, द बोरिङ कम्पनीले न्यूयोर्कदेखि डीसीसम्म भूमिगत हाइपर लुपको लागि "मौखिक सरकारी स्वीकृति" प्राप्त गरेको छ । त्यस समयमा अधिकारीहरूले मस्कको दाबीको पुष्टि गरेको थिएन ।
न्युरालिङ्कको मस्तिष्क चिप प्रविधि के हो?
कम्पनीले मस्तिष्कको सतहमा सिलाउन इलेक्ट्रोडले भरिएको कम्प्युटर चिप र शल्यक्रिया गर्न रोबोटिक उपकरण डिजाइन गरेको छ । मस्कले यस्ता यन्त्रहरू नियमित रूपमा अपग्रेड गर्न सकिन्छ भन्ने कल्पना गरेका छन् ।
"म पक्का छु कि यदि आईफोन १४ उपलब्ध छ भने तपाईँले आफ्नो टाउकोमा आईफोन १ अड्किएको चाहनुहुन्न," मस्कले नोभेम्बरको अन्तमा एउटा कार्यक्रममा भने, जहाँ उनले न्यूरालिङ्कले छ महिनामा मानव परीक्षणहरू सुरु गर्ने भविष्यवाणी गरेका थिए ।
