काठमाडौं । निर्धन उत्थान लघुवित्त वित्तीय संस्था लिमिटेड र इन्फिनिटी लघुवित्त वित्तीय संस्थाको लाभांश सुरक्षित गर्ने अन्तिम दिन आज रहेको छ । यी दुवै कम्पनीले साधारण सभा प्रयोजनको लागि फागुन २ गते बुक क्लोज गरेकाले फागुन १ गतेसम्म कायम शेयरधनीमात्र साधारण सभामा भाग लिन र लाभांश पाउन योग्य हुनेछन् । 

निर्धन उत्थान लघुवित्तले गत आर्थिक वर्षको मुनाफाबाट शेयरधनीलाई १९ प्रतिशत बोनस शेयर र कर प्रयोजनको लागि १ प्रतिशत नगद लाभांश वितरण गर्ने प्रस्ताव गरेको छ । यो प्रस्ताव पारितका लागि कम्पनीले फागुन १२ गते साधारण सभा बोलाएको छ । सभा कम्पनीको केन्द्रीय कार्यालय नक्साल भगवतीबहाल, काठमाडौंमा बिहान १० बजे शुरू हुने कम्पनीले जानकारी दिएको छ । 

त्यस्तै इन्फिनिटी लघुवित्त वित्तीय संस्थाले गत आवको मुनाफाबाट शेयरधनीलाई २० प्रतिशत बोनस शेयर वितरण गर्ने प्रस्ताव गरेको छ । उक्त लाभांश पारितका लागि कम्पनीले फागुन १३ गते साधारण सभा बोलाएको छ ।

साधारण सभा सहमति संस्था विजय चोक गैंडाकोट, नवलपरासीमा बिहान ११ बजे शुरू हुने कम्पनीले जानकारी दिएको छ । कम्पनीले नेपाल एग्रो लघुवित्तलाई प्राप्ति गरेको हुँदा लाभांशमा कर छुट हुने भएकोले कर प्रयोजनको लागि रकम छुट्याइएको छैन ।