aarthiknews.com मंगलबार, ३१ असार २०७६   Tuesday, 16 July, 2019
 
पूर्वराजा वीरेन्द्रको सम्पत्ति भाडामा लिएर व्यवसाय गर्न पाइने, ऐन संशोधन गर्न संघीय संसदमा पुग्यो विधेयक

वीरेन्द्रको सम्पत्ति भाडामा लिएर व्यवसाय गर्न पाइने

  • आर्थिकन्यूज
    आर्थिकन्यूज
  • सोमबार, १६ पुस २०७५
Sunrise bank
वीरेन्द्रको सम्पत्ति भाडामा लिएर व्यवसाय गर्न पाइने
NIBL-Capital-inside
LBEF

काठमाडौं, पुस १६ । पूर्वराजा वीरेन्द्र शाह र उनको परिवारको नाममा रहेको जग्गा भाडामा दिएर आर्थिक उपार्जन गर्ने लक्ष्यसहित सरकारले नयाँ कानुन निर्माणको तयारी गरेको छ ।

हाल नेपाल ट्रस्टको मातहतका रहेको राजा वीरेन्द्रको जग्गा जमिन तथा भौतिक सम्पतिको संरक्षण गर्ने र निश्चित समयका लागि भाडामा दिएर आर्थिक उपार्जन गर्ने लक्ष्यका साथ कानुन निर्माणको प्रक्रिया अगाडि बढाइएको र संघीय संसद्को चालू अधिवेशनमा नै पेश गर्ने तयारी गरिएको छ ।

पर्यटकीय र व्यावसायिक कार्य सञ्चालन गर्न नेपाल ट्रष्टको सिफारिसमा निश्चित अवधिका लागि व्यक्ति वा संस्थालाई भाडा दिने व्यवस्था सहितको विधेयक तयार भएको छ ।

यसअघि सरकारले शिक्षा तथा बौद्धिक संस्थालाई अनुदानमा दिन सकिने बताउँदै आएको थियो । त्यसमा अस्पताल, स्वास्थ्य चौकी र सार्वजनिक प्रयोजनका चिकित्सालय संञ्चालन गर्न सकिने भनिएको थियो ।

दरबार हत्याकाण्डमा मारिएका राजा वीरेन्द्र, रानी ऐश्वर्य तथा उनीहरूका परिवारको नाममा रहेको सम्पत्ति गणतन्त्र आइसकेपछि राष्ट्रियकरण गरिसकिएको छ ।

ट्रष्ट स्थापना भएको ११ वर्षपछि राजपरिवारको नाममा रहेको जग्गा तथा सम्पत्ति भाडामा दिन लागिएको हो ।
नेपाल ट्रष्ट कार्यालयका निमित्त प्रमुख रहेका सहसचिव यदुप्रसाद पन्थीले राज परिवारको नाममा रहेको सम्पत्तिहरू प्रयोग विहीन बनाउनुभन्दा त्यसलाई भाडामा दिएर ट्रष्टको आय वृद्धि गर्न लागिएको बताएका छन् ।

५५ वटा कानुनको संशोधनमा परेको यो कानुन विधेयकका रूपमा हाल संघीय संसदमा पुगेको छ । राजा वीरेन्द्रका परिवारका नाममा रहेको २१ हजार ५ सय ६३ रोपनी जग्गा नेपाल ट्रष्टको स्वामित्वमा रहेको छ । त्यसमा काठमाडौंमा मात्रै १५१ वटा कित्तामा ४ हजार ४३८ रोपनी जग्गा रहेको छ ।

यस्तै भक्तपुर, ललितपुर, नुवाकोट, धनकुटा, मकवानपुर, काभ्रेपलाञ्चोक, सिन्धुपाल्चोक, सुर्खेत, कास्की, चितवन र धादिङमा समेत जग्गा रहेको छ ।

काठमाडौंको गोकर्ण फरेष्ट रिसोर्ट, काठमाडौं प्लाजा, लाजिम्पाटस्थित स्ट्यान्डर्ड चार्टर्ड बैंक रहेको भवन, टेकुस्थित बिजनेस पार्क र कालिमाटीमा रहेको सोल्टी आउटर कम्प्लेक्स पनि पूर्व राजपरिवारको नाममा रहेको छ ।

त्यस्तै पोखराको फेवातालमा रहेको रत्नमन्दिर भवन, भरतपुरस्थित दियालो बंगला, र हेटौंडामा कान्ति ईश्वरी भवन लगायतका भवन र जग्गा रहेको छ । ती मध्येका केही राजा वीरेन्द्रकै पालामा भाडामा दिइएका र पहिलेकै सम्झौताअनुसार भाडामै रहेको बताइएको छ ।

संघीय संसद सचिवालयले उक्त विधेयकका बारेमा आवश्यक निर्णय गर्ने तयारी गरेको छ । संघीय संसद्को चालू अधिवेशनमा नै सो विधेयकलाई अगाडि बढाउन लागिएको छ । सम्पत्तिको सुरक्षा पनि हुने र त्यसबाट अर्थोपार्जन गर्ने सोच राखिएको नेपाल ट्रष्टले जनाएको छ ।

प्रतिक्रिया दिनुहोस