भ्रष्टाचार मुद्दा लागेका पूर्वनासु आचार्यले गरे आत्महत्या - Aarthiknews
aarthiknews.com शुक्रबार, २० मंसिर २०७६   Friday, 06 December, 2019
 
Bajaj_Bike

भ्रष्टाचार मुद्दा लागेका पूर्वनासु आचार्यले गरे आत्महत्या

  • आर्थिकन्यूज
    आर्थिकन्यूज
  • सोमबार, २७ साउन २०७६
Sunrise bank
भ्रष्टाचार मुद्दा लागेका पूर्वनासु आचार्यले गरे आत्महत्या
LBEF
NCH-IPS

काठमाडौं । सरकारी जग्गा गैरकानुनी रुपमा व्यक्तिको नाम दर्ता गराएको आरोपमा विशेष अदालतमा मुद्दा दायर गरिएका कलंकी मालपोतका पूर्वकर्मचारी हरिप्रसाद आचार्यले आत्महत्या गरेका छन् ।

आफू ठूलो भ्रष्टाचारी नभएको भन्दै सुसाइड नोट लेखेर उदयपुर, त्रियुगा नगरपालिका–१० का ५५ वर्षीय पूर्वनायव सुब्बा आचार्यले शनिबार राति आत्महत्या गरेको जिल्ला प्रहरी कार्यालय उदयपुरले जनाएको छ ।

अख्तियार प्रमुख नवीनकुमार घिमिरेको नाममा दुई पानाको सुसाइड नोट लेखी झुण्डिएर आत्महत्या गरेको डिएसपी हरिकृष्ण केसीले जानकारी दिए ।
आचार्यले लगाएको कपडाको गोजीमा ‘अख्तियार प्रमुख घिमिरेको आयु २०० वर्ष होस, म ठूलो भ्रष्टाचारी होइन’, लेखिएको सुसाइड दुई पानाको नोट फेला परेको हो ।

मालपोत कार्यालय कलंकीमा रहँदा भ्रष्टचार मुद्दा लागेपछि आचार्यले आत्महत्या गरेको हुन सक्ने प्रहरीको अनुमान छ । आचार्यले पूर्वगाविस सचिव, जिल्ला अस्पताल उदयपुर हुँदै जिल्ला जनस्वास्थ्य कार्यालय झापामा पनि काम गरेका थिए ।

झापाबाट मालपोत कार्यालय काठमाडौं कलंकी हुँदै उनी कर्मचारी समायोजनका क्रममा उदयपुरको त्रियुगा नगरपालिका पुगेका थिए । त्रियुगा नगरपालिका वडा नम्बर ४ को वडा सचिवका रूपमा काम गरेका आचार्यले वडाअध्यक्षसँग विवाद भएपछि राजीनामा दिएको वडा कार्यालयको भनाइ छ ।

मालपोत कार्यालय कलंकीमा रहँदा उनीसहित सातजनालाई सामुदायिक वनको जग्गा गैरकानुनी रूपमा सुयल हाउजिङ कम्पनीका नाममा श्रेस्ता खडा गरी पूर्जासमेत उपलब्ध गराएको आरोपमा अख्तियारले विशेष अदालतमा मुद्दा दायर गरेको थियो ।

आर्चायसहित सातजनाविरूद्ध विशेष अदालतमा अख्तियार दुरूपयोग अनुसन्धान अयोगले गत जेठ १३ गते सामुदायिक वनको जंगल व्यक्तिका नाममा नामसारी गरेको आरोपमा मुद्दा दर्ता गरेको थियो । अख्तियारले कलंकीका मालपोत अधिकृत शिवप्रसाद रिमाल र नायव सुब्बा हरिप्रसाद आचार्य, नक्कली जग्गाधनी मीनाकुमारी थापा, सुयल हाउजिङ्ग कम्पनीका सञ्चालक रामकुमार सुयल थापा, नक्कली जग्गाधनी मिनाकुमारी थापाको वारेस दीपेन्द्रविक्रम शाह, अधिवक्ता बाबुराम (शर्मा) रेग्मी र अधिवक्ता योगेन्द्र पोखरेलविरूद्ध विशेष अदालत काठमाडौंमा आरोप–पत्र दायर गरेको थियो ।

यस्तो छ, सुसाइड नोट

‘मेरो नाममा पुराण लगाउने काम नगर्नु, नउक्साउनु, मलाई सबैले नराम्रो देख्लान् । तर, पारिवारिक वातावरण मिलाउन सकिनँ । कामबाट चोखिने काम मात्र गर्नु, मैले काम गर्दा भएको गल्ती हो । गल्ती स्वीकार गरी नेपाल सरकारलाई बताइसकेको थिएँ । ममीले छोराहरूसँग र सासुसँग मिलेर बस्नु र छोराले पनि ममीलाई राम्रो गर्नु । म विदा भएँ । खातामा पैसा छ । श्रीमती केही जान्दिन । साथीभाइले मनैले सहयोग गर्नु, मलाई बस्नेतको आँपगाछी हुँदै जंगलमा खोज्नु । कान्छो छोराको ब्याचलर सकेको हेरुलाँ भनेको थिएँ, सकिनँ, पापी भएँ । वाणिज्य बैंक, नेपाल बैंक, एनसिसी बैंक, एनआइसी बैंकमा के कति पैसा छ, चेक दराज भित्र सानो ब्यागमा छ । अन्यमा पैसा भए पनि कमै छ ।’

त्यसअघि उनले लेखेका छन्, ‘वीरेन्द्र काकालगायत छिमेकीले भैंसी, खसी तह लगाइदिनु । आमा, साहिँली बुहारी र भतिजाले सुरक्षा गर्नु । सतिले सरापेको देश रहेछ, मैले दुई पैसा खाएको छैन । तर म देशको ठूलो भ्रष्टचारी भएँ ।’

प्रहरीका अनुसार मृतक आर्चायको सुसाइड नोटमा अगाडि लेखिएको छ, ‘अख्तियारका प्रमुख आयुक्त नवीनकुमार घिमिरेको आयु २०० वर्ष होस् । मजस्ता निर्दोषलाई विशेष अदालतमा मुद्दा छ, रमेश भाइ काठमाडौंले सहयोग गर्नु । सबै ढोका बन्द गरेर कान्छो छोरा पढाएर गोमा काठमाडौं बस्नु । गोमाले रंंगिन लुगा लगाउनु, १३ औँ दिनमा सबै फुकाउनु ।’

प्रतिक्रिया दिनुहोस