aarthiknews.com विहीबार, ०६ माघ २०७८   Thursday, 20 January, 2022
 
British College

कहिलेसम्म सडक छेकेर कार्यक्रम गर्ने ?

  • आर्थिकन्यूज
    आर्थिकन्यूज
  • सोमबार, १३ मंसिर २०७८
Global IME
LBF

रामबहादुर थापा
बागलुङ । न सार्वजनिक मञ्च, न सभागृह । बागलुङ सदरमुकाममा सधैँ खड्किने विषय हो यो । खुलास्थल नहुँदा सडक वा चोकमै  कार्यक्रम गर्नुपर्ने यहाँको बाध्यता छ । राजनीतिक दलदेखि सङ्घ संस्थासम्मले कहिलेकाहीँ बाटै छेकेर भेला वा सम्मेलन गर्छन् । 

यस्ता कार्यक्रमले  सिधै बजार र यातायात सोवामा असर पार्छ । यसै त साँघुरा सडक र चोकका कारण बागलुङ बजारको सवारी साधनको व्यवस्थापन चुनौतीपूर्ण छ, त्यहीँमाथि बीच सडकमै हुने त्यस्ता कार्यक्रमले यातायात सेवा थप अस्तव्यस्त बन्छ । आम चुनावताका त चोकमा मञ्च नै खडा गरेर विभिन्न दलले सभा गर्दै आएका छन् ।

यसै साता भएका नेपाली कांग्रेसको तहगत अधिवेशनमा सडक बन्द भयो । क्षेत्रीय र जिल्ला अधिवेशनका बेला पाँच दिनसम्म यहाँका मुख्य सडक बन्द भएका थिए  । गत मङ्गलबार, शनिबार र आइतबार हल्लनचोकदेखि अदालत जाने चोकसम्म सवारीसाधन रोकियो । सडकछेउ रहेको एक पार्टी प्यालेसमा अधिवेशन भएका कारण त्यस क्षेत्रको सडकमा असर परेको हो ।

मतदानका दिन पार्टी प्यालेसदेखि चोकसम्मै कांग्रेस नेता, कार्यकर्ताको घुइँचो लागेको थियो । पैदलयात्रीलाई बाटो आउजाउ गर्न पनि कठिन भएको थियोे । त्यसअघि प्रदेश तहको क्षत्रीय अधिवेशनका बेला पनि धवलागिरि चोकदेखि बालमन्दिरसम्मको सडक बन्द हुनुपुगेको थियो । अधिवेशन बालमन्दिर प्राविको परिसरमा भएको थियो ।

मतदानपछि उद्योग वाणिज्य सङ्घको सभाकक्षमा गणना कार्य चलिरहँदा ट्राफिक प्रहरीले लोकतान्त्रिक चोकदेखि गोदामचोकसम्मको सडक बन्द गर्नुपर्यो । यी त प्रतिनिधि उदाहरण मात्र हुन् । सदरमुकाममा ठूलोस्तरका सभा, समारोह आयोजना हुँदाको स्थिति सधैँ उही छ । सार्वजनिकस्थलको अभाव छ । ठूलो सङ्ख्यामा मानिस अटाउने सभाकक्ष छैनन् । होटल वा पार्टी प्यालेसमा भएका कक्षको क्षमता कम छ ।

सडक अवरुद्ध गरेर कार्यक्रम गर्न नपाइने भए पनि व्यावहारिकता हेरेर छोड्नु परेको जिल्ला ट्राफिक प्रहरी कार्यालयका प्रमुख बद्रीनाथ शर्माले बताए । “खास त नमिल्ने हो तर हामीलाई पनि बाध्यता छ, कहिलेकाहीँ व्यवहारिकता हेरिदिनुपर्ने हुन्छ”, उनले भने, “खुला सार्वजनिकस्थल र ठूलो सभागृह भएका भए यो समस्या पक्कै आउने थिएन ।” 

सडक नै रोकिने गरी कार्यक्रम हुँदा केही कठिनाइ हुने गरे पनि जेनतेन यातायात व्यवस्थापन गर्ने गरिएको उनको भनाइ थियो  । प्रमुख शर्माले यो स्थिति दोहोरिन नदिन सम्बद्ध पक्षको ध्यानाकर्षण गराउने र ट्राफिक प्रहरी आँफैले पनि सक्दो प्रयास गर्ने बताए । स्थानीय तह, जिल्लाको प्रशासनिक निकाय, राजनीतिक दललगायत सरोकार भएका पक्षले यसबारे सोचेर विकल्प खोज्न ढिलो भइसकेको बागलुङ उद्योग वाणिज्य सङ्घका अध्यक्ष युवराज राजभण्डारीले बताए । 

“विशेष गरी बागलुङ नगरपालिकाले यस विषयमा  पहल गर्नुपर्छ, सिटी हल बनाउने योजना ल्याइए पनि त्यो कार्यान्वयनमा आउन सकेन”, उनले भने,  “सार्वजनिकस्थल नभएकाले यस वर्ष बागलुङ महोत्सव पनि नगर्ने मनिस्थितिमा हामी पुगेका छौँ ।” सङ्घले यसअघिका केही महोत्सव शुल्क तिरेर धवलागिरि क्याम्पसको चौरमा गरेको थियो । पहिले पहिले राजनीतिक दलका आमसभा पनि सोही क्याम्पसको मञ्चमा हुने गथ्र्यो ।  पछि बाहिरी कार्यक्रमलाई क्याम्पसले रोक लगाएको थियो । 

अध्यक्ष राजभण्डारीले बाङ्गेचौर, चिप्लेटी बसपार्क, गोदामघरलगायत ठाउँमा सिटीहल बनाउन सकिने बताए । शहरोउन्मुख बागलुङ बजारमा अहिलेसम्म एउटै व्यवस्थित सभागृह छैन । मूल सडक र चोकमै कार्यक्रम भइदिँदाको मर्का व्यवसायी माथि पनि छ । कतिपय टोलले सडकमा कार्यक्रम गर्न रोक लगाउन खोजे पनि त्यसको कडाइपूर्वक पालना हुन सकेको छैन । जग्गा व्यवस्थापन गर्न नसक्दा सिटीहल बनाउने बागलुङ नगरपालिकाको योजना अझै अधुरो छ । त्यसका लागि सरकारबाट वर्षेनी छुट्याइएको बजेट फिर्ता हुने गरेको छ । सिटीहल निर्माणमा जनप्रतिनिधि अक्षम देखिएको सर्वसाधारणको आरोप छ । रासस 

प्रतिक्रिया दिनुहोस