aarthiknews.com आइतबार, २८ असार २०७७   Sunday, 12 July, 2020
 
Citizen life

धितोपत्र बजारमा कालोधन नियन्त्रण गर्न, सम्पत्ति शुद्धीकरणसम्बन्धी नयाँ निर्देशन जारी

  • आर्थिकन्यूज
    आर्थिकन्यूज
  • आइतबार, ०८ असार २०७६
Sunrise
HIb
धितोपत्र बजारमा कालोधन नियन्त्रण गर्न, सम्पत्ति शुद्धीकरणसम्बन्धी नयाँ निर्देशन जारी
LBEF

काठमाडौं ।  धितोपत्र बजारमा कालोधन नियन्त्रण गर्ने उद्देश्यले सम्पत्ति शुद्धीकरणसम्बन्धी नयाँ निर्देशन जारी भएको छ । यसअघिको सम्पत्ति शुद्धीकरणसम्बन्धी निर्देशिका विस्तापित गर्दै बोर्डले नयाँ निर्देशन जारी गरेको हो । सम्पत्ति शुद्धीकरणसम्बन्धी ऐनमा भएको व्यवस्थाअनुसार बोर्डले शुक्रबार जारी गरेको यो निर्देशन ०७६ साउनदेखि लागू हुनेछ ।

 

यसअघिको निर्देशिकालाई थप व्यवस्थित र प्रस्ट पार्दै नयाँ निर्देशन जारी गरिएको बोर्डले जनाएको छ । हालको व्यवस्थाअनुसार धितोपत्र ब्रोकरले १० लाख रुपैयाँभन्दा माथिका र सबै शंकास्पद कारोबार हरेक १५/१५ दिनमा वित्तीय जानकारी इकाईमा बुझाउनुपर्छ ।

यो व्यवस्था भए पनि ब्रोकरहरूले शंकास्पद कारोबारको विवरण बुझाएका छैनन् । हालसम्म दुईवटा मात्र शंकास्पद कारोबारसम्बन्धी विवरण आएको वित्तीय जानकारी एकाइको तथ्यांक छ ।

नयाँ व्यवस्थाअनुसार लगानीकर्ताले ब्रोकरहरूले लगानीकर्ताको विवरण चुस्त दुरुस्त राख्नुका साथै नियमित रूपमा विवरण पनि बुझाउनुपर्नेछ । यसबारेमा बोर्डले सबै सरोकारवालालाई बोलाएर निर्देशनसम्बन्धी जानकारी पनि गराइसकेको छ । लगानीकर्ताको आम्दानीको स्रोत पहिचान गर्न, कुनै अस्वाभाविक कारोबार देखिए शंकास्पद मानेर उजुरी गर्नुपर्नेलगायत पक्ष निर्देशनमा छ ।

जोखिममा आधारित आन्तरिक नीति, कार्यविधि तथा कार्य, ग्राहक पहिचान तथा सम्पुष्टि गर्ने तरिका, उच्च पदस्थ व्यक्तिको पहिचान अवलम्बन गर्नुपर्ने उपाय, वास्तविक धनी पहिचानलगायत पक्ष पनि निर्देशनमा उल्लेख छ । ‘निर्देशनमा जोखिम व्यवस्थापन र मूल्यांकनको आधार, बृहत् तथा सरलीकृत ग्राहक पहिचान गर्ने तरिका सम्बन्धमा स्पष्ट व्यवस्था गरिएको छ,’ बोर्डले जारी गरेको विज्ञप्तिमा उल्लेख छ ।

यस्तै निर्देशनमा सूचक संस्थाले आफ्नो कारोबार र व्यवसाय सञ्चालन गर्दा कानुनको पालना र उच्च नैतिक मापदण्डहरूको पालना र अनुसरण गर्नुपर्ने, ग्राहकको सही रूपमा पहिचान तथा सोको सम्पुष्टि गर्नुपर्ने, उच्च पदस्थ व्यक्तिको विशेष पहिचान वा यकिन गर्दा थप उपायसमेत अवलम्बन गर्नुपर्ने व्यवस्था छ ।

सूचक संस्थाले वास्तविक धनी वा निजको परिवार तथा सम्बद्ध व्यक्तिको सूचीको अभिलेख व्यावसायिक सम्बन्ध वा कारोबार समाप्त भएको मितिले पाँच वर्षसम्म राख्नुपर्नेछ । संस्थाले जोखिम पहिचान, मूल्यांकन तथा व्यवस्थापन गर्दा राष्ट्रिय तथा क्षेत्रगत जोखिम मूल्यांकनसम्बन्धी प्रतिवेदन, सम्पत्ति शुद्धीकरण तथा आतंकवादी क्रियाकलापमा वित्तीय लगानी सम्बन्धमा कुनै प्रतिष्ठित अन्तर्राष्ट्रिय संस्थाले अवलम्बन गरेको विधि अपनाउनुपर्ने पनि निर्देशनमा उल्लेख छ ।

संस्थाले जोखिमलाई उच्च, मध्यम, न्यूनवर्गमा वर्गीकरण गर्नुपर्नेछ । ‘संस्थाले जोखिमको आधारमा आफूसँग कारोबार गरिरहेका तथा गर्ने ग्राहकको पहिचानसम्बन्धी सूचना तथा विवरण राख्ने व्यवस्था लागू गर्नुपर्नेछ,’ निर्देशनमा उल्लेख छ, ‘एक दिनमा पटकपटक वा एकैपल्ट १० लाख रुपैयाँभन्दा बढीको कारोबारको जानकारी वित्तीय जानकारी इकाईमा दिनुपर्नेछ ।’

उल्लिखित व्यवस्था पालना नगर्ने/नगराउने संस्था, कर्मचारी तथा पदाधिकारीलाई १० लाखदेखि ५ करोड रुपैयाँसम्म जरिवाना तथा संस्थाको दर्ता खारेजसम्मका कारबाहीको व्यवस्था निर्देशनमा छ ।

प्रतिक्रिया दिनुहोस