औषधिको कच्चा पदार्थमा ५०% मूल्यवृद्धि, जनता मारमा पर्ने पक्का - Aarthiknews
aarthiknews.com सोमबार, २४ चैत्र २०७६   Monday, 06 April, 2020
 
Tansen_cement
Janahit Suchana

औषधिको कच्चा पदार्थमा ५०% मूल्यवृद्धि, जनता मारमा पर्ने पक्का

  • आजको आर्थिक अभियान दैनिकबाट
    आजको आर्थिक अभियान दैनिकबाट
  • सोमबार, १२ फागुन २०७६
Sunrise
औषधिको कच्चा पदार्थमा ५०% मूल्यवृद्धि, जनता मारमा पर्ने पक्का
LBEF

काठमाडौं । चीनको वुहानबाट फैलिएको कोभिड १९ (कोरोना) भाइरसको प्रभाव नेपाली औषधि उद्योगमा पनि देखिन थालेको छ । नेपालका औषधि उद्योगले आयात गर्ने कच्चा पदार्थको मूल्य भारतमा ५० प्रतिशतसम्म बढेको छ भने संक्रमण लम्बिँदै गए कच्चा पदार्थ आयातमा समेत अप्ठ्यारो हुने सक्ने देखिएको छ । 

कोभिड १९ भाइरसको प्रभावपछि पछिल्लो समय चीनबाट औषधिसम्बन्धी कच्चा पदार्थको आयातमा कमी हुँदा भारतमै यसको मूल्य बढेको औषधि उद्योगीहरूको भनाइ छ । त्यहाँबाट आयात गर्न समस्या भएकाले बजारमा कच्चा पदार्थको अभाव देखिन थालेको हो । चीनबाट कच्चा पदार्थ नआएपछि भारतबाट आयात गर्दा मूल्य बढेको नेपाल औषधि उत्पादक संघका अध्यक्ष नारायणबहादुर क्षत्रीले बताए ।

नेपाली औषधि उद्योगहरू कच्चा पदार्थका लागि भारतमै निर्भर रहने गरेकाले त्यहाँ मूल्यमा आउने उतारचढावले यहाँ प्रभाव पार्ने गर्छ । संघका अनुसार भारतले आफूलाई चाहिने ७५ प्रतिशतभन्दा बढी औषधीय कच्चा पदार्थ चीनबाटै आयात गर्छ । नेपाली उद्योगहरूले सोही कच्चा पदार्थ भारतबाट नेपाल ल्याउने गरेका छन् । अहिले भारतमै पनि औषधि र कच्चा पदार्थको मूल्य बढेको भारतीय सञ्चारमाध्यमहरूले उल्लेख गरेका छन् । 

‘नेपालमा आयात हुने कच्चा पदार्थमध्ये ४० प्रतिशतको मूल्य बढेको छ,’ उनले भने । यद्यपि, हरेक औषधि उत्पादक कम्पनीले २/३ महीनासम्मका लागि कच्चा पदार्थ भण्डारण गर्ने भएकाले कच्चा पदार्थको आयात मूल्य बढे पनि तत्कालका लागि औषधिको मूल्य भने नबढेको क्षत्रीले बताए । भारतमै पनि २ महीनासम्मका लागि मात्र कच्चा पदार्थको भण्डार बाँकी रहेकाले कोभिड १९ भाइरसको प्रभाव रहिरहे भारतबाट कच्चा पदार्थ आयात गर्न नसकिने उनी बताउँछन् । 

नेपाल औषधि उत्पादक संघका पूर्वअध्यक्ष शंकर घिमिरेका अनुसार औषधि उद्योगहरूले सामान्यतया ३ महीनाको कच्चा पदार्थको स्टक राख्ने गरेका छन् । तर, पछिल्लो समय भारतबाटै आयात गर्न पनि समस्या आएको उनले बताए । ‘भारतका विक्रेताहरू अहिले हामीसँग कच्चा पदार्थ आयात गर्दा तुरुन्तै पैसा पठाउनुपर्ने भन्न थालेका छन्, जबकि हामीले १ महीनासम्मको बाँकी अवधि पाउने गरेका थियौं,’ उनले भने ।

प्रतिक्रिया दिनुहोस