आर्थिकन्यूज
टोकियो। जापानको केन्द्रीय बैंक (बैंक अफ जापान) ले आगामी जुन १५–१६ मा बस्ने मौद्रिक नीति बैठकमार्फत प्रमुख नीतिगत ब्याजदर ०.७५ प्रतिशतबाट बढाएर १ प्रतिशत पुर्याउने तयारी गरेको छ।
जापानी आर्थिक दैनिक निक्केईका अनुसार देशमा मुद्रास्फीतिको दबाब अपेक्षाभन्दा बलियो देखिन थालेपछि केन्द्रीय बैंकले ब्याजदर थप वृद्धि गर्ने निष्कर्षमा पुगेको हो। यदि निर्णय कार्यान्वयन भएमा पछिल्ला वर्षहरूमा बैंक अफ जापानको मौद्रिक कडाइको क्रमले नयाँ चरणमा प्रवेश गर्नेछ।
प्रतिवेदनअनुसार केन्द्रीय बैंकले सरकारी ऋणपत्र (जेजिबी) खरिद कार्यक्रमको कटौती योजनालाई पनि पुनरवलोकन गरिरहेको छ। सन् २०२७ अप्रिलदेखि लागू गर्ने भनिएको ऋणपत्र खरिद घटाउने कार्यक्रमलाई केही समय रोक्ने विकल्पमाथि समेत छलफल भइरहेको बताइएको छ।
जापानले लामो समयसम्म अत्यन्त न्यून ब्याजदर र सहज मौद्रिक नीति अपनाउँदै आएको थियो। तर पछिल्ला वर्षहरूमा मूल्यवृद्धि दर लक्ष्यभन्दा माथि रहन थालेपछि बैंक अफ जापानले क्रमशः ब्याजदर बढाउने नीति लिएको छ।
केन्द्रीय बैंकको औपचारिक निर्णय भने जुन १५-१६ को नीति बैठकपछि सार्वजनिक हुने अपेक्षा गरिएको छ। निक्केईले यसलाई ‘विकासशील समाचार’का रूपमा उल्लेख गरेको छ।
प्रतिक्रिया