काठमाडौं । बौद्धिक सम्पत्ति सम्बन्धी १५ सय वटा मुद्दा उद्योग विभागमा रहेको उद्योग वाणिज्य तथा आपूर्ति मन्त्रालय सचिव कृष्णबहादुर राउतले बताएका छन् । शुक्रबार विश्व बौद्धिक सम्पत्ति दिवस पारेर आयोजना गरिएको कार्यक्रममा बोल्दै सचिव राउतले यस्तो बताएका हुन ।
उनले भने, ‘नेपालमा बौद्धिक सम्पत्ति प्रतिको चासो र चेताना बढेको पाइएको छ । यसमा कति पय विषयमा कानुन प्रष्ट नहुँदा मुद्दाको किनारा लगाउने उपायाहरु निस्केका छैनन् भने कति पय विषयमा सर्जकहरुले नै मुद्दा हालेर पुन सम्पर्कमा आउनु भएको छैन ।’ अरुको लोगो वा पेटेन्ट चोरेमा उद्योग विभागको आदेशले एक लाखसम्म जरिवाना र सो कसुरसँग सम्बन्धित सबै मालसामान जफत हुने कानुनी व्यवस्था रहेको छ ।
त्यस्तै, पूर्वमन्त्री एसपी कोइरालाले नेपालमा बौद्धिक सम्पत्ति सम्बन्धी कानुनहरुलाई यथासक्दो चाडो बनाउन र प्रक्रियामा रहेकालाई तत्कालै टुंग्याउन पर्ने बेला भइसकेको बताए ।
पेटेन्ट राइटका लागि ८७६ वटा आवेदन परेका छन् भने ५२ वटा स्वदेशी र ३६ वटा विदेशीले पेटेन्ट दर्ता गराएका छन् । त्यस्तै, डिजाइनमा ७ सय ८५ ले आवेदन दिएकोमा ३१० वटा दर्ता भएका छन् जसमा ११४ स्वदेशी र १९६ विदेशी रहेका छन् । त्यस्तै, एक लाख १३ हजार ६०७ ट्रेडमार्कका लागि दर्ता भएकामा ३४ हजार ३६३ वटा स्वेदशी उद्योगले ट्रेडमार्क दर्ता गराएका छन् भने २८ हजार ८४१ विदेशीले ट्रेडमार्क लिएका छन् ।
