काठमाडौं । लगानी बोर्डले तेस्रो अन्तर्राष्ट्रिय लगानी सम्मेलनको पहिलो दिन एक दर्जन परियोजनाका लागि आशयपत्र आह्वान गरेको छ । बोर्डले औधौगिक पार्क, प्रदर्शनी केन्द्र, जलविद्युत परियोजना, अस्पताल, सार्वजनिक यातायातलगायतका परियोजनाका लागि आशयपत्र मागेको हो ।
बोर्डले सूचीको पहिलो नम्बरमा पोखरा सम्मेलन केन्द्रलाई राखेको छ । सरकारले पोखरा नयाँबजारस्थित हाल प्रदर्शनी केन्द्र रहेको जग्गामा दुई हजार जना अट्ने सम्मेलन केन्द्र बनाउने तयारी गरेको थियो । कुल एक अर्ब ६१ करोड लागत लाग्ने अनुमान गरिएको उक्त परियोजनाका लागि स्रोत सुनिश्चित हुन नसकेपछि काम अघि बढ्न सकेको छैन ।
चन्द्रागिरि–चित्लाङ–पालुङ–चितवन एक्सप्रेसवेका लागि पनि आशयपत्र माग गरिएको छ । २ खर्ब २१ अर्ब १२ करोड लागत अनुमान गरिएको यो परियोजना सम्पन्न भएमा चन्द्रागिरिबाट पालुङ हुँदै चितवनको दूरी एक घण्टामा छोट्टिने पूर्वानुमान गरिएको छ ।
यस्तै ‘दि जानकी हेरिटेज होटेल एण्ड कल्चरल भिलेज’ प्रोजेक्ट सूचीमा राखिएको छ । राम र सीताको विवाह भएको ऐतिहासिक महत्व रहेको जनकपुरमा विवाह पर्यटनलाई वृद्धि गर्ने उद्देश्य राखिएको यस परियोजनाको लागत अनुमान अढाई अर्ब रहेको छ ।
बोर्डले धुलिखेल मेडिसिटी आयोजना र गौतमबुद्ध प्रसूति अस्पतालका लागि स्वास्थ्य क्षेत्र दुईवटा परियोजनामा लगानी गर्न इच्छुक कम्पनीसँग पनि आशयपत्र मागेको छ । धुलिखेल मेडिसिटी आयोजनाको लागत अनुमान ११ अर्ब र गौतमबुद्ध प्रसूति अस्पतालको लागत अनुमान १ अर्ब ४४ करोड रुपैयाँ छ ।
सुदूरपश्चिम सार्वजनिक यातायातको परियोजनाका लागि पनि आशयपत्र आह्वान गरिएको छ । यसको प्रस्तावित लागत ३१ अर्ब १३ करोड रुपैयाँ छ । १७२ बस र ४७ बसबिसौनी प्रस्ताव गरिएको यो परियोजना लागू भएमा कैलाली, कञ्चनपुर र डोटीको यातायात अवस्था सुधार हुनेछ ।
यस्तै बबरमहल प्रशासनिक प्लाजा निर्माण योजना पनि बोर्डले समेटेको छ । उक्त परियोजनाको लागत १० अर्ब २० करोड अनुमान गरिएको छ ।
लगानी सम्मेलनको अवसर पारेर यसपटक तीनवटा जलविद्युत परियोजनाका लागि आशयपत्र माग गरिएको छ । जसमा नौमुरे बहुउद्देश्यीय आयोजना, ६५० मेगावाट कालिगण्डकी-२ जलविद्युत आयोजना र खिम्ती थोसे जलविद्युत आयोजनाका लागि आशयपत्र आह्वान गरिएको छ । नौमुरेको ९२ अर्ब रुपैयाँ, कालिगण्डकी-२ को एक खर्ब ७४ अर्ब ७३ करोड रुपैयाँ र खिम्ती थोसेको २ खर्ब ८९ अर्ब ७७ करोड रुपैयाँ लागत अनुमान गरिएको छ ।
यस्तै कञ्चनपुरको बेदकोटमा निर्माण गर्ने भनिएको देजी औद्योगिक पार्कका लागि पनि आशयपत्र माग भएको छ । सुदूरपश्चिमको आर्थिक गतिविधि चलायमान बनाउने उद्देश्य राखिएको यस परियोजनाको प्रस्तावित लागत ८ अर्ब ६० करोड रुपैयाँ रहेको छ ।
