काठमाडौं । सानिमा जिआईसी इन्स्योरेन्स लिमिटेडले २५ प्रतिशत हकप्रद शेयर विक्री गर्ने भएको छ । निर्जीवन बीमा कम्पनीले २ अर्ब ५० करोड रूपैयाँ चुक्तापूँजी कायम गर्नुपर्ने व्यवस्था बमोजिम यस कम्पनीले हकप्रद मार्फत पूँजी बढाउन लागेको हो ।
हाल कम्पनीको चुक्तापूँजी २ अर्ब रूपैयाँ रहेको छ । सोही पूँजीको आधारमा ५० करोड रूपैयाँ बराबरको हकप्रद शेयर विक्री गर्ने प्रस्ताव कम्पनीले गरेको हो । हकप्रद निष्कासन लगाएत अन्य विविध प्रस्ताव पारितका लागि कम्पनीले चैत २९ गते छैठौं वार्षिक साधारण सभा बोलाएको छ ।
चैत १ गते बसेको कम्पनीको सञ्चालक समितिको बैठकले अमृतभोग, कालिकास्थान, काठमाडौंमा विहान ११ बजे सभा गर्ने निर्णय गरेको हो । सभाले हकप्रद निष्कासनको प्रस्तावसँगै गत आर्थिक वर्ष ०७९/८० को वार्षिक प्रतिवेदन सहितका वित्तीय विवरण स्वीकृत गर्नेछ । चालू आर्थिक वर्षको लागि लेखापरिक्षक नियुक्ती र निजको पारिश्रमिक निर्धारणको विषय पनि सभाले टुङ्ग्याउनेछ ।
यस वर्ष लाभांश प्रस्ताव भने कम्पनीले गरेको छैन् । उल्लेखित प्रस्तावहरूसँगै सञ्चालक समिति र उपसमितिको बैठक भक्ता तथा अन्य सुविधा अनुमोदन गर्ने प्रस्ताव पनि सभाका लागि तय भएको छ । हकप्रद शेयर निष्कासनका लागि आवश्यक सम्पूर्ण कामको जिम्मेवारी समेत सभामार्फत सञ्चालक समितिलाई दिइनेछ ।
साधारण सभा प्रयोजनका लागि कम्पनीले चैत १५ गते एक दिन बुक क्लोज गर्ने भएको छ । बुक क्लोजको आधारमा चैत १४ गतेसम्म कायम शेयरधनीहरू मात्र सभामा भाग लिन योग्य हुनेछन् ।