काठमाडौं । रिक्त रहेको नेपाल पर्यटन बोर्डको प्रमुख कार्यकारी अधिकृत (सीईओ)मा धनन्जय रेग्मीले आवेदन दिएका छन् । गएको माघ १६ गते सीईओको कार्यकाल सकाएर बसेका रेग्मीले पुनः सीईओ बन्न आवेदन दिएका हुन् ।
उनको कार्यकाल सकिएयता बोर्ड नेतृत्वविहीन बनेको छ । सीईओ छनोटका सरकारले लागि तीन सदस्यीय समिति गठन गरेको थियो । समितिले सीईओ छनोटका लागि कार्यविधि बनाइसकेको छ । तर, सो कार्यविधि कानून सम्मत नभएको भन्दै पर्यटन बोर्ड कर्मचारी संगठनले नै विरोध जनाएका छन् । नयाँ कार्यविधिले पर्यटन क्षेत्रको अनुभवलाई कम मान्यता दिएर शैक्षिक योग्यतालाई मात्र प्राथमिकतमा राखेको संगठनको तर्क रहेको छ ।
स्मरण रहोस, फेरि सीईओ बन्न तम्सिएका रेग्मी पटक पटक विवादमा मुछिएका व्यक्ति हुन् । उनी सीईओ हुँदा बेलायतबाट नेपाल फर्कने क्रममा त्रिभुवन अन्तर्राष्ट्रिय विमानस्थलमा रक्सीको निहुमा भन्सारका कर्मचारीसँग झगडा गरेका थिए । उक्त विषयमा पर्यटन मन्त्रालयले उनलाई स्पष्टीकरण सोधेको थियो । त्यसबाहेक उनलाई पदीय हैसियतको दुरूपयोग, नैतिक आँचरण विपरीत काम गरेको र आर्थिक अनियमिततामा मुछिएको आरोपमा निलम्बन समेत गरिएको थियो ।