काठमाडौँ । सन् २०२२ देखी २०२४ सम्म प्रकाशित धेरै अनुसन्धानात्मक अध्ययन रिपोर्टहरूले सूचना प्रविधि इन्टरनेटको क्षेत्रमा भएको नयाँ आविष्कार ‘फाइभ जी’ मानव स्वास्थ्यको लागि ठूलो खतरा भएको औँल्याएका छन् । यी अनुसन्धान रिपोर्टहरूले फाइभ जीबाट निस्कने विकिरण यसबारेको अन्तर्राष्ट्रिय निर्देशिका ‘इन्टरनेशनल कमिसन अन नन-आयोनजींग रेडिएसन प्रोटेक्सन गाइडलाइन’ले गरेका व्यवस्था विपरीत रहेको देखाएका छन् ।
अध्ययनहरूले खुलासा गरे अनुसार फाइभ जी ले स्नायु प्रणालीमा नै असर गर्ने देखिएको हो । जसको परिणामस्वरूप मानसिक स्वास्थ्य समेत बिग्रने हुनसक्छ । त्यस बाहेक मानिसको मस्तिष्कको विकाशमा समेत यसले बाधा पुर्याउने देखिएको छ । यसरी मानिसको मस्तिष्कमा असर पर्दा डीमेन्सिया हुने रिपोर्टमा उल्लेख छ ।
डिसेम्बर २०२३ मा गरिएको एक अध्ययनमा फाइभ जी ले मानिसको प्रजनन क्षमता समेत नष्ट गर्ने देखिएको छ। भाले मुसामा गरिएको एक परीक्षणमा शुक्रकीटको सङ्ख्या घटेको र त्यसको गुणस्तर समेत नराम्ररी खस्किएको पाइएको हो ।
दुई महिना अघि फेब्रवरीमा गरिएको अर्को अध्ययनमा पनि फाइभ जीका तरङ्गहरूले शरीरको मेटाबोलिजममा असर गर्ने र रोग प्रतिरक्षात्मक क्षमता समेत कम हुने देखिएको छ । ताररहित विधिबाट हुने कुनै पनि सञ्चारका लागि उत्पन्न गराइएका तरङ्ग र त्यसका विकिरणहरू मानव स्वास्थ्यका लागि हानिकारक हुने चर्चा निकै अघि देखी भए पनि त्यसबारे खासै ध्यान नदिँदा अहिले त्यसका गम्भीर असरहरू धेरै तिर देखिइसकेका छन् ।
यस्तो अवस्था बारे चिन्ता गर्दै सन् २०१७ यता ४ सय भन्दा बढी वैज्ञानिकहरूले युरोपियन युनियनमा ६ वटा अपिल समेत दर्ता गराएका छन् । तर, ती सबै सम्बन्धित अधिकारीहरूको बेवास्तामा परेको बताइन्छ ।