सितैमा ढुवानी पाएको नुनमा पनि कालोबजारी, नौ रुपैयाँको नुनलाई २५ रुपैयाँ


आर्थिकन्यूज

काठमाडौं, मंसिर २ । बाजुरामा ढुवानी अनुदानको भानु नुनमा कालोबजारी भएको छ । बजार मूल्य नौ रुपैयाँ रहेको नुन खरिद गर्दा उपभोक्ता २५ रुपैयाँ तिर्न बाध्य छन् । ढुवानी अनुदानको नुन बिक्री गर्ने जिम्मा बाजुरास्थित साल्ट ट्रेडिङ लिमिटेडको डिपोलाई मात्रै छ ।

डिपोका कर्मचारीले व्यापारीसँग कमिसन लिएर नुन बिक्री गरिरहेका छन् । ‘डिपोमा जाँदा छैन भन्छन्, पसलमा जाँदा पाइन्छ । व्यापारीबाट खरिद गर्दा हामी बढी मूल्य तिर्न बाध्य छौं’, खप्तड छेडेदह गाउँपालिका–१ की भाना थापाले दुखेसो गरिन् ।

व्यापारीबाट २५ रुपैयाँमा एक किलो नुन किन्नुपर्छ बूढीगंगा नगरपालिकाका भुवन थापाले भने । ‘कर्मचारीले किलोमा चार रुपैयाँ कमिसन लिन्छन् । व्यापारीले २५ रुपैयाँमा बिक्री गर्छन्’, थापाले भने । अरू ब्रान्डका नुन पनि २५ रुपैयाँ किलोमा बिक्री भइरहेको छ ।

‘भानु नुनमा आयोडिन बढी हुने भएकाले धेरैको रोजाइमा पर्दा कालोबजारी मौलाएको हो’, उनले भने । ढुवानी अनुदानको नुन बिक्री गर्न दुई वर्षअघि साल्ट ट्रेडिङले मौरेमा डिपो खोलेको हो ।

‘अन्य ब्रान्डको नुन पनि हामी २५ रुपैयाँमा नै बिक्री गर्छौ । भानु नुन धेरै बिक्री हुन्छ । डिपोबाट पाएपछि बेच्नै पर्यो’, एक व्यवसायीले भने ।

साल्ट ट्रेडिङ कर्पोरेसनको मौरे डिपो कार्यालयका कर्मचारी महावीर साउदले भने ढुवानी अनुदानको नुन व्यवसायीलाई बिक्री नगरेको दाबी गरे । ‘उपभोक्तालाई दुई क्विन्टलसम्म दिन्छौं । त्यही नुन कसैले बेच्यो भने हामी केही गर्न सक्दैनौं’, साउदले भने । डिपोले ९ रुपैयाँमै नुन बिक्री गरेको साउदले जनाए । अन्नपूर्ण पोस्टबाट ।

फेसबुकबाट तपाईको प्रतिक्रिया