अझै पूरा भएन ५६ वर्ष पुरानो योजना

तेह्रथुम, पुस २६ । निर्माण सुरु भएको ५६ वर्ष बितिसक्दा पनि तेह्रथुमको पिंगुवा सिँचाइ आयोजना पूरा नहुँदा म्याङलुङ नगरपालिकाका किसान सिँचाइ सुविधाबाट वञ्चित भएका छन् ।

विसं २०१६ मा निर्माण सुरु भएको १८ किलोमिटर लामो यो आयोजना निर्माणका लागि स्थानीयले माग गरेपनि सुनुवाइ नभएको साव्ला गाविसका पूर्व अध्यक्ष एवम् पिंगुवा सिँचाइ आयोजनाका अध्यक्ष अभिनारायण लिम्बूले बताए ।

आयोजनास्थलमै आएर दुईवर्ष अघि पूर्व्सिँचाइमन्त्री एनपी साउदले आयोजनाको काम तत्कालै सुरु गर्ने आश्वासन दिनुभएको थियो । तर त्यसयता कुनै काम नभएको स्थानीयको भनाइ छ । अठार किलोमिटर लामो कुलो भएको यो आयोजना निर्माणका लागि रु ५५ करोड खर्च हुने सिँचाइ विकास डिभिजन कार्यालय तेह्रथुमले जनाएको छ ।

आयोजना सम्पन्न भएमा म्याङलुङ नगरपालिकाको एक हजार ७०० हेक्टर क्षेत्रफल जमिन सिँचाइ हुने कार्यालयले जनाएको छ । रासस

1 COMMENT

LEAVE A REPLY

फेसबुकबाट तपाईको प्रतिक्रिया