वाइवाई अब युरोपमा उत्पादन हुँदै

काठमाडौं, पुस १५ । चौधरी ग्रुपले युरोपमा पनि वाइवाई चाउचाउको उत्पादन सुरु गर्ने भएको छ । युरोपेली राष्ट्र सर्बियाको रुमा सहरमा वाइवाई प्लान्ट स्थापना अन्तिम चरणमा पुगेको चौधरी ग्रुपले जनाएको छ ।

युरोपेली महाद्वीपमा चौधरी ग्रुपको यो पहिलो उद्योग हुने र चौधरी युरोपबाट तयारी चाउचाउको उत्पादन थाल्ने नेपालको पहिलो व्यावसायिक समूह हुने कम्पनीले जनाएको छ ।

सर्बियाबाट निकट भविष्यमै वाइवाईको व्यावसायिक उत्पादन सुरु हुने ग्रुपले जनाएको छ । त्यहाँबाट उत्पादित चाउचाउ युरोपेली बजारमा वितरण गरिने छ । सर्बियामा स्थापित उद्योगले पहिलो चरणमा करिब चार सयलाई रोजगारी दिनेछ । उत्पादन र वितरण सुरु हुँदासम्म १२ सयभन्दा बढीलाई रोजगारी प्रदान गर्ने चौधरी ग्रुपले जनाएको छ । वाइवाई विश्वका ३० मुलुकमा उपलब्ध रहेको ग्रुपको भनाइ छ ।

चौधरी ग्रुपका अध्यक्ष विनोद चौधरीले बिहीबार बेलग्रेडमा सर्बियाका प्रधानमन्त्री अलेक्ज्यान्डर भुसिकसँग भेटवार्ता गरेका छन् । उनले त्यहाँका ऊर्जा, पर्यटन तथा कृषिमन्त्री र रुमा सहरका मेयर स्लोदान म्यान्सिकसँग समेत भेटे गरेका छन् । चौधरी ग्रुपका प्रबन्ध–निर्देशक निर्वाण चौधरी पनि भेटघाटमा सहभागी थिए ।

सर्बियाली प्रधानमन्त्रीसँगको भेटमा अध्यक्ष चौधरीले नेपालको लोकप्रिय ब्रान्ड वाइवाईलाई विश्वव्यापी रूपमा विस्तार गर्ने अभियानअन्तर्गत युरोपमा वाइवाईको उत्पादन सुरु गर्न लागेको बताए्का थिए । ‘नेपाली उद्यम र व्यवसायलाई विश्वसामु लैजाने प्रयत्नस्वरूप युरोपमा प्लान्ट स्थापना गरिएको हो’, भेटपछि चौधरीले भने ।

भेटमा प्रधानमन्त्री भुसिकले सर्बियामा वाइवाई प्लान्ट स्थापना गरी लगानी विस्तार तथा रोजगारी सिर्जना गरेकोमा धन्यवाद दिएको ग्रुपद्वारा जारी विज्ञप्तिमा उल्लेख छ । त्यस्तै, मेयर म्यान्सिकले सर्बियाको स्थानीय सरकार उद्यमीसँग सहकार्य तथा सहयोगका लागि तयार रहेको बताउँदै चौधरी ग्रुपले उद्योग स्थापना गरेकोमा धन्यवाद दिएका थिए । त्यसअघि अध्यक्ष चौधरीले रुमा सहरको रुम्स्का इन्डस्ट्रियल लुपमा वाइवाईको प्लान्ट अवलोकन गरेका थिए ।

विश्व बजारको २.२५ हिस्सा

विश्वव्यापी रूपमा वार्षिक २ अर्ब २० करोड युनिट बिक्री भइरहेको वाइवाईले विश्व तयारी चाउचाउ बजारको २.२ प्रतिशत हिस्सा ओगटेको ग्रुपको दाबी छ । नेपालमा ६ र भारतमा ८ प्लान्टमार्फत वाइवाई उत्पादन भइरहेको छ ।

नेपालमा सर्वाधिक बिक्री हुने वाइवाईले भारतीय तयारी चाउचाउ बजारमा २७ प्रतिशत हिस्सा ओगटेको ग्रुपले जनाएको छ । बंगलादेश, केन्या र साउदी अरेबियामा पनि वाइवाईका प्लान्ट स्थापना गर्ने तयारी भइरहेको चौधरी ग्रुपले बताएको खबर आजको नयाँ पत्रिका दैनिकमा छापिएको छ ।

LEAVE A REPLY

फेसबुकबाट तपाईको प्रतिक्रिया